Feriebricht – Feriegedicht

von Urs Zwahlen

Samschdig 05.05.18
Zwische Ains und Zwai kömmen alli aa
niemerts het e Panne ghaa
Me begriesst sich, "Salli", "Tschau"
"Schöön ass derbyy bisch" - "Jo Dangge, Du au"

Nach em Zimmerbezug duet s nit lang goo
und alli steen umzooge mit em Velo doo
Die eerschti Fahrt, wo nit lang duure duet
isch nach der lange Rais uff jede Fall guet

Sunndig, 06.05.18
Scho beraits am Morge frieh
räägnet s, wie sunscht doo nie
S isch gruusig duss, s wird nass und nasser
drum fallt dr Fottitermin buechstäblig ins Wasser
Dass losst - dr Kurt duet s nit preschtiere
nach em Zmorge denn alli diskutiere
denn jede duet am Handy hängge
um sich s Programm vo hüt usszdängge

"Mir fahre jetzt", "Mir fahre nit"
"Mir göön spööter, wär kunnt mit?"
"Mir göön go ässe mit em Kaare
s ka gärn no öpper mit is fahre"

Mer sitzen umme, sinnn e glai muff
uff aimool kunnt denn Hektig uff
S höört uff räägne, dr Himmel wird häll
do handlet dr Amin im Hintergrund schnäll
Es träffe sich denn noodisnoo
13 Naase, zem uff e Düürli z goo
E tolli Rundi, nur het niemmert s gsait
won is s Velo hütt aanedrait
100 Kilo- und 1'000 Hööhemeter sinn z überstoo
was dr aint oder die ander an d Gränze losst koo

Dr Kurt hingeege het nur ai Zyyl
vo dr Irma z Molina d'Era verzellt är vyyl

Mändig, 07.05.18
Dr zwaiti Daag lauft denn wie gschmiert
zeerscht wird d Gsellschaft fotigrafiert
Denn schliesst me sich en ere Grubben aa
ganzi vier dien mer haa
Team Kurt, Team Urs - die sinn e bitz schnäller
denn no dr Buser und die vom Käller
So fahrt jedes (isch das wichtig?)
glyy druff aaben in en anderi Richtig

S Team Urs fahrt d Tour gemäss em Garmin
wo suuber gfiehrt wird vom Trinkler Armin (beschte Dangg)
Über Pomarance nach Castelnuovo
wo s Coca git, Kaffi und Ovo (Dangge Margrith)

In Monterotondo möcht dr Urs denn Spaghetti
usser em Peter sait kain "Joo, das wett y"
S goot denn nit lang und mir halten aa
well jede Gummibärli und e Riigel muess haa!
Das isch wichtig, me bruucht d Energie
well dr nägscht Uffstiig wiider happig duet syy
Es schaffen alli, mit Mieh und au ohne
drum dien mer is in Canneto mit Glacé belohne

Zyschdig, 08.05.18
Wie geschter, fangt s au hüt guet aa
nach Nääbel hämmer Sunneschyyn ghaa
Mer fahre zügig - Volterra isch s Zyyl
uff schöner Strooss, Verkehr het s nit vyyl
In de änge Gässli hämmer s Bärgfahre giebt
d Tourischte wo laufe, hänn is sicher gliebt
Uns isch s egal, öb s dääne duet stingge
mir göön uff dr Piazza aine go dringge (Dangge Martin W.)

Gemäss Armin - är macht s sunscht jo guet
kunnt jetzt e Strooss, wo nur aabegoo duet
Doch laider het är sich e bitzli trumpiert
s goot uffen und aabe - me sait däm coupiert
Bym Aabligg vom Gfängnis, wo uff der Route duet stoo
dänggt jede vo uns - Ouuh bin ych froh
do duen y vyyl lieber, statt döört inne sitze
jetzt e glai lyyde und e bitzeli schwitze

San Gimignano isch prächtig und scheen
wo sehr vyyl Tourischte gärn aane geen
Es isch scho Zwai, mir hänn Glügg und finde
e Baizli, wo mer Platz hänn, uff der Piazza hinde
D Pasta schmeggt, si isch wirgglig sehr guet
drum mergge mer nit, was sich am Himmel duet
Wolgge ziehn uff, mir zahle, geen wytter
s seht uss am Himmel zimmlig schytter
S goot 30 Minute, no halte mer aa
und ziehn is, wär het, Räägeklaider aa
Dr Rääge wird stergger, s blitzt, mer flueche
drum dien mer am e Huus e glai Schärme sueche
E Viertelstund duet das so goo
denn losst dr Rääge uff aimool noo
Mir fahre wytter, doch scho glyy
hoolen is d Wolgge wiider yy
Es räägnet nit, es schüttet brutal
jede Meter wird so zer Qual
Es het kai Huus, kai Schopf, kai Door
wo me sich schütze könnt dervor
S Schlimmen isch - und das nit z gnabb
s goot kilometerlang durab

S Wasser ströömt über d Strooss
d Angscht vorm e Sturz die isch gross
Wyt unde het s en Ärdrutsch gee
zem Glügg hämmer dä no rächtzyttig gseh
Kelti, Nessi, e Schmärz döört und doo
losst jede e bitzli an d Gränze koo
Nach 10 Kilometer, oder e bitz meh
dien mer zem Glügg Molina d'Era seh
D Baiz isch zueh, doch offen isch d Bar
alli sinn happy - s isch wunderbar
Drieffend nass, zitternd, froh
dien mer gärn döört yyne goo
Haisse Kaffi bringt jeden uff d Bai
ohni Rääge fahre mer aaschliessend hai

Mittwuch, 09.05.18
E grösseri Grubbe, s isch famoos
fahrt hüt zämme vom Hotel loos
S lauft ganz guet, au mit soo vyyl
San Vincenzo isch hüt s eerschte Zyyl
Im Corso Italia sinn mer aane gsässe
hänn feyne Kueche und Gelatti gässe
Das kunnt em ainte nit so guet
dä fühlt sich stargg, het ganz vyyl Muet
E Stürzli git s, doch es sinn alli froh
ass das glimpflig duet uusegoo
Z Suvereto - dr Zuefall het s gee
hämmer e Grubbe vom VCR gseh
Moderat goot s wytter und mer sinn is im Klaare
s isch die schönscht Streggi, wo me do unde ka fahre
D Midaagspause, so het s aim dunggt
z Sassetta, e wyttere Hööhepunggt
Im Roma - mir wärde no lang drvo verzelle
git s supergueti Tagliatelle
Mir brächen uff und s muess glaub so syy
ohni Rääge goot au die Tour nit ganz verbyy

Donnschdig, 10.05.18
Nach Casciana Terme wänn mer hüt goo
doch isch s wägem Wätter nit derzue koo
Nach anderhalb Stund, s isch nit zem Lache
mien mer in Castellina e Pause mache (Merci Peter/Gianni)
S fangt aa räägne, mir sitzen e Wyyl
und ändere denn halt unser Zyyl
Über Miemo goot s zrugg und scho glyy
duet s Wätter wiider besser syy
Statt hai an Pool, entschaide mer z fahre
Richtig Meer, nach Cecina Mare
Bruschetta und Pannini dien munde
im Baizli diräggt am schööne Strand unde
Und well s schöön isch und mir so glatti
spendiert dr Urs Rotach e Rundi Gelatti (Grazie)
D Haifahrt isch happig, dr Bärg isch stail
mir wärde belohnt, denn d Ussicht isch gail

Frydig, 11.05.18
Dr letschti Daag und me glaubt s fascht nit
s Wätter macht für aimool mit
E grossi Grubbe het s hüt gee
wo dr Aastiig nach Miemo in Aagriff duet nee
S isch herrlig zem Fahre, au d Landschaft doo
fascht kai Auti duet doo koo
Im e Kaffi z La Sterza an der Strooss

Als Höhepunggt, wie könnt s anders syy
kehre mer in der Molina e'Era by dr Irma yy
Hinden uss im schööne Garte
duet si uns scho lang erwarte
Mer wärde verwöhnt, denn ohni z bschtelle
git s Cannelloni und Tagliatelle
Grazie mille saage mer doo
s nägscht Mool wärde mer wiider koo

Zem Dessärt git s, für die aine
e staile Bärg, e ganz gemaine
Volterra isch s Zyyl, wenn s au Weh mache duet
derfür schmeggt d Gelatti döört dopplet so guet (Merci Heinz)

Kai Aastiig bruucht em Kurt sy Grubbe
dääne isch Volterra schnubbe
Die rolle zem Abschluss - dasch au o.k.
zrugg ins Hotel, zem am Pool aine nee

Fazit
So ändet die Wuche, find ych perseenlig
by guete Verhältnis doch no verseenlig
Trotz Rääge, wo fascht dääglig duet falle
het s hoffentlig alle e bitzeli gfalle

E grosse Dangg, wie jedes Moll
goot an Kurt, dä macht das toll
S isch nit lyycht, das kann y verzelle
soo vyyl Individualischte z friide z stelle
Johr für Johr git är sich Mieh
do diemer vor em dr Chapeau zieh – Merci